《城外的人想衝進去 城內的人想逃出來》
自從2014暑假去過巴西阿根廷，之後去既地方都總係有一種曾經滄海難為水既感覺。南美對我總係有一種好神奇既魔力，或者因為仲未比強國人入侵，因為有我最愛既草泥馬，因為未被過度開發既神秘，因為各種森林部落印加文明⋯然而我認真諗過種種原因，所有客觀上既美麗大概都只係一種美麗，只有主觀既心去欣賞先會將美麗變得感動人心。所以一句講曬，我就係偏愛呢個地方吹咩。
係旅途上面好難得會遇到黎自南美既人，尤其係紐西蘭呢類物價奇高既地方。而禁岩，我尋日竟然係hostel遇到一個黎自阿根廷大約40歲既男人。
阿根廷，係阿根廷!一聽到已經超開心!但佢竟然顯得唔太想提起自己既國家。傾傾下先發現原來佢已經離開左阿根廷好多年，依家係NZ 同Canada 做野。其實係阿根廷佢算係好幸運既人，有機會離開自己經濟衰落既出生地去其他大國發展。但係聽到佢果句I will never go back again 心入面總係有一種好可惜既感覺。我係度諗，自己會唔會有一日都變成禁？
逗留幾日什至幾個月既地方係旅途上既家，佢地通常有一個共通點，總是美好的。而出世成長既家，通常都總係有野睇唔順眼。或者香港好快就會真係變成講廣東話方言既中國某某省，但有時候我就只想堅持一d自己覺得岩、值得既野。
有人話自己既城市都未睇清就話要出去睇世界係一種荒謬，我不可置否。但其實我覺得看過了世界以後，我更識得珍惜自己係一個 真·香港人，更加覺得我地絕對值得好似其他西方國家禁擁有自由民主。
都係果句啦，隔離飯總係特別香，不過日日都食既始終都係住家飯。
(南生圍，香港)
Search